🔸 مساء الخير سيد
🔹مسّاك الله بالنور والسرور عزيزي ، ها بشّر تفكّرت بالروايتين اللي عطيتك وياهم البارحة ؟
🔸 الحمدلله قريتهم على السريع 😄
🔹 زين ، ويش فهمت من الروايات لمّا قريتها ؟
🔸 حسّيتها قريبة من الكلام اللي كنت تقول لي عنّه البارحة وهو أنّ لازم نعرض مذهب أهل البيت عليهم السلام بطريقة مؤدبّة تعكس أخلاقهم ...
🔹 مؤدبّة *وعلميّة أيضاً* ، وبالفعل هذي الروايات تتكلّم عن منهج المسالمة اللي تكلّمنا عنّه البارحة ، أحسنت 👍🏼
🔸 انزين سيدنا أبي أقولك شغلة ...
🔹تفضّل
🔸 ترى من بعد حوارنا أمس ، جتني أسئلة وشبهات أكثر وأكثر عن موضوعنا 😑
🔹ولا يهمّك ، أنا هنا عشان أجاوبك عليها جميعها بتوفيق الله 🌷
🔸 سيد بكون وياك صريح على الآخر وتحمّل صراحتي وجاوبني بكل أمانة أرجوك 🙏
🔹أكيد ياولدي ، خذ راحتك واعتبرني مثل أبوك وأنا عندي أمانة وهي إنّي أوصل لك علوم مدرسة أهل البيت سلام الله عليهم 😊
🔸 سيد بكل صراحة ... لمّا كنت تتكلم عن منهج المسالمة وتقول أنّه هو المنهج الصحيح ، هل هالشي يعني أنّ في منهج ثاني وهذا المنهج خطأ ؟ 🤨
🔹 نعم ، في منهج ثاني ونطلق عليه اسم *منهج المصادمة* وهو أنّك تدعو إلى مذهب أهل البيت عن طريق شتم الآخر أو تكفيره أو الجهر بشتم الأشخاص الذين يقدّسهم ... وهذا منهج غير صحيح ومنهج المسالمة هو الصحيح وأنا اليوم هنا عشان أبيّن لك الأدلّة على صحة منهج المسالمة 😊
🔸 تمام ، انزين سؤال ثاني سيدنا ... سيد بكل أمانة ، ماتشوف أنّ الدوافع وراء منهج المسالمة اللي تتكلم عنّه هي دوافع سياسيّة و إعلاميّة بحته ؟؟؟ يعني ماتلاحظ أنّ هو نفس أسلوب السياسيين والإعلاميين اللي يكذبوا على النّاس عشان يحققوا مصالحهم 🤨
🔹 لا أبداً عزيزي الأمر مو بهالشكل ، منهج المسالمة *تفرضه علينا منطلقات دينيّة شرعية وماهو منهج تفرضه علينا ظروف سياسية معيّنة أو مصالح سياسية معيّنة* 😊
🔸 طيب ويش هي هالمنطلقات الدينيّة الشرعيّة ؟ 🤔
🔹راح أذكرها لك ، وهي نفسها الأدلّة على صحة منهج المسالمة ...
🔸 يعني عصفورين بحجر 😉
🔹ايه نعم 👍🏼...
👈🏼و أول هذي المنطلقات ياولدي هو *بقاء المنهج الإمامي* ... وهنا بسألك سؤال ياطالب البترول ...
🔸تفضّل سيدنا 😎
🔹 حل هذي المعادلة : مباني البترول + طلّاب البترول = ؟
🔸 عاد ماجبت لي إلا مسألة رياضيّة ياسيّد 😐، أتوقع تساوي دكاترة البترول 😅
🔹 واضح أنّك جايب العيد في الرياضيات 🤭
🔸 خلها مستورة ياسيد خلها مستورة 😂 💔
🔹 😂، الله يساعدك .. على كل حال الإجابة الصحيحة تساوي جامعة البترول 😊
🔸 أمّا عاد 😦، شلون وليش 😅؟
🔹بجاوبك بسؤال ثاني منطقي ...
🔸 لحظة سيد بس بقولك ترى ماعندنا مادّة اسمها المنطق في الجامعة 😅، يعني بس عشان لا ...
🔹 😂 لا تخاف .. السؤال سهل وبتجاوب عليه إن شاء الله 👍🏼 ، طيب السؤال يقول هل الجامعة بتكون جامعة بدون طلّابها ؟
🔸لا طبعاً ، أصلاً الطلّاب هم راس مال الجامعة وهم اللي محلّينها ❤️...
🔹 شكلك تبي تقول شي ثاني كمّل كمّل ...
🔸إيه كنت أبي أقولك إنّي زرت الجامعة خلال فترة كورونا وبصراحة حسيتها مدينة أشباح مب جامعة ☹️
🔹مدينة أشباح مرّة وحدة ! 😂 ، ليش عاد ؟
🔸 مافيها طلّاب ياسيّد يعني مافيها حياة ، هدوووء قاتل 👎🏼👎🏼
🔹خوش ، خل نرجع لموضوعنا ... تتوقع المذهب الشيعي ممكن يبقى بدون وجود الشيعة والموالين 🤔؟
🔸 إيه ممكن
🔹 متأكد ؟
🔸إيه طبعاً ، عاد هذا السؤال مو سؤال رياضي ياسيّد عشان تقعد تشككني 😌
🔹 😂 ، طيب نشوف ننقاش اجابتك ، ليش قلت أنّ ممكن يبقى المذهب بدون الشيعة ؟
🔸 أتوقع مثل مثلاً بعض المذاهب أو الديانات اللي مالها أتباع في هالأيام بس أن التاريخ يذكرهم في الكتب
🔹 يعني وجود هالمذاهب والأديان حبر على ورق ؟ 🤔
🔸 إيه صح تقدر تقول 👍🏼
🔹 وإذا نبي المذهب يكون حي ويكون له حضور في حياة الإنسان ؟
🔸 لا هنا أكيد لازم يكونوا حاضرين أهل المذهب
🔹 أحسنت ، إذاً نقدر نقول أنّ المذهب كأنّه راية ( راية الولاية لأهل البيت عليهم السلام ) لازم تحملها الأجيال جيل بعد جيل عشان يبقى المذهب ...
🔸إي صح تشبيهك حلو 👌🏽
🔹 عشان كذا ياولدي أهل البيت سلام الله عليهم كانو حريصين جداً على حياة كل فرد في هذا المذهب ، وكان هدف من أهدافهم
أن يبقى هالمذهب ببقاء أهله وفي رواية نستدل بها على هالشي [موجودة في موقع السيد ماذكرتها هنا للاختصار ] ...
🔸جميل 👌🏽 ، طيب شلون صار هذا دليل على صحّة منهج المسالمة مافهمت ؟ 🤔
🔹 الأمر واضح ، يعني أن كل فرد شيعي مسؤول عن بقاء هذا المذهب ويكون هالشي بحفظ أهل المذهب ... *فما يحق لأي واحد أنّ يستغل وسيلة إعلامية أو يستغل موقع معيّن عشان يعبّر عن مشروعه أو عن معتقده اللي يتسبب بتلف نفوس بعض المؤمنين أو انّه يستلزم انقراض المذهب بانقراض أهل المذهب.*
🔸واضح 👍🏼 ، بس هذا هو الدليل ؟
🔹لا باقي خير 😅 ... بس نكتفي بهذا اليوم ونكمل البقيّة في يوم ثاني 🌷
انتظرونا في الحلقة القادمة 🕐 .....
ليست هناك تعليقات:
إرسال تعليق